2024 წლის 26-28 ივნისს ინსბრუკის უნივერსიტეტში
(ავსტრია) პროგრამის ERASMUS-EDU-2023-CBHE ფარგლებში გაიმართა პროექტის „კურიკულუმის
რეფორმა სამშვიდობო განათლების ხელშეწყობისთვის საქართველოში, უკრაინასა და მოლდოვაში“
(Curriculum Reform to Promote Education for Peace in Ukraine, Georgia and
Moldova (PeaceEdu) სასწავლო შეხვვედრა. სამდღიანი
შეხვედრის მიზანი იყო პროექტის მონაწილე საქართველოს, უკრაინისა და მოლდოვას წარმომადგენლების
გუნდებს ტრენინგების ფარგლებში შეესწავლათ ევროპული გამოცდილება სამშვიდობო განათლების
მიმართულებით, როგორც მასწავლებელთა მომზადების საგანმანათლებლო პროგრამების, ასევე
ზოგადი საუნივერსიტეტო სასწავლო კომპონენტისთვის. გარდა ამისა, აღნიშნული ქვეყნების დელეგატებმა წარმოადგინეს
ყოვლისმომცველი ანგარიშები სამშვიდობო განათლების მიმდინარე მდგომარეობის შესახებ,
საჭიროებების დეტალურ ანალიზთან ერთად როგორც ეროვნულ, ასევე ინსტიტუციურ დონეზე. წარდგენილმა
პრეზენტაციებმა აჩვენა ის გამოწვევები, რომელთა წინაშეც დგას პროექტის მონაწილე ქვეყნების
საუნივერსიტეტო კურიკულუმები, განსაკუთრებით მასწავლებელთა მომზადების საგანმანათლებლო
პროგრამები.
პროექტის მონაწილე პარტნიორებმა ავსტრიიდან,
ფინეთიდან და გერმანიიდან საქართველოს, უკრაინისა და მოლდოვის გუნდებს სასწავლო ტრენინგების დროს შესთავაზეს ღირებული
პერსპექტივები სამშვიდობო განათლების ფორმალურ საგანმანათლებლო სისტემებში ინტეგრირების
შესახებ. შემუშავდა სამშვიდობო განათლების კონცეპტუალური ჩარჩო, რომელიც მორგებულია
უკრაინის, საქართველოსა და მოლდოვის სპეციფიკურ საჭიროებებზე. დისკუსიების დროს იდეებისა
და საუკეთესო პრაქტიკის გაცვლამ ხაზი გაუსვა სამშვიდობო განათლების ერთიანი მიდგომის
მნიშვნელობას, მის როლს მომავალ თაობებს შორის მშვიდობისა და ურთიერთგაგების კულტურის
ხელშეწყობაში.
შეხვედრის დასასრულს, მონაწილეებმა გამოხატეს მხარდაჭერა
სამშვიდობო განათლების განვითარებისა და მისი გრძელვადიანი მდგრადობის უზრუნველყოფის
მიმართ თავიანთ ქვეყნებში.
სოხუმის სახელმწიფო უნივერსიტეტიდან ინსბრუკის
სასწავლო შეხვედრასა და ტრენინგებში მონაწილეობდნენ PeaceEdu -ს პროექტის წევრები: ასოც. პროფ. თამარ ფხალაძე, ასისტენტი ლევან კვარაცხელია
და დოქტორანტი ია მურღულია.
